బెజవాడ దుర్గమ్మకు మొక్కు చెల్లించుకున్న తెలంగాణ సీఎం కేసీఆర్

తెలంగాణ సీఎం కేసీఆర్ బెజవాడ దుర్గమ్మకు మొక్కు చెల్లించుకున్నారు. కుటుంబసమేతంగా ఆలయానికి చేరుకున్న సీఎంకు.. మహామండపం దగ్గర ఆలయ ప్రధాన అర్చకులు పూర్ణకుంభంతో స్వాగతం పలికారు. అమ్మవారికి చేయించిన ముక్కుపుడక, పట్టు వస్త్రాలు తీసుకొని.. సీఎం మేళ తాళాల మధ్య ఆలయంలోనికి ప్రవేశించారు. అమ్మవారిని దర్శించుకుని ప్రత్యేక పూజలు చేసిన తర్వాత.. ముక్కు పుడకను సమర్పించారు. అనంతరం ఆలయ పండితులు కేసీఆర్ దంపతులకు ఆశీర్వచనాలు అందజేసి.. దుర్గమ్మ ప్రసాదాన్ని అందించారు. 

అమ్మవారి దర్శనం అనంతరం కేసీఆర్‌ను ఆలయ పాలకమండలి సభ్యులు సీఎంను శాలువాతో సన్మానించారు. ఏపీ మహిళా కమిషన్ ఛైర్‌పర్సన్ నన్నపనేని రాజకుమారి గాజులు, చీరతో కేసీఆర్ సతీమణి శోభకు అందజేశారు. తెలంగాణ సీఎం వెంట మంత్రులు నాయిని, ఇంద్రకరణ్‌రెడ్డి.. ఎంపీలు కేకే, సుమన్‌, మిషన్ భగీరథ ఛైర్మన్ ప్రశాంత్‌లు ఉన్నారు. మరోవైపు కేసీఆర్‌ను చూసేందుకు భక్తులు కూడా ఎగబడ్డారు. 

అంతకముందు హైదరాబాద్ నుంచి ప్రత్యేక విమానంలో గన్నవరం చేరుకున్న కేసీఆర్‌కు మంత్రి దేవినేని ఉమామహేశ్వరరావు ప్రభుత్వం తరపున స్వాగతం పలికారు. అక్కడి నుంచి గేట్ వే హోటల్‌లకు వెళ్లిన కేసీఆర్ అక్కడే కాసేపు ఉన్నారు. అనంతరం గుడికి వెళ్లి మొక్కు చెల్లించుకున్నారు. తిరిగి బెజవాడ నుంచి హైదరాబాద్‌కు బయల్దేరారు.

తెలంగాణ సీఎం టూర్‌తో పోలీసులు భారీ బందోబస్తు ఏర్పాటు చేశారు. 
దుర్గమ్మకు చేయించిన ముక్కు పుడకను 11.29 గ్రాముల బంగారంతో తయారు చేయించగా.. అందులో 57 వజ్రాలున్నాయి. తెలంగాణ రాష్ట్రం ఏర్పడితే బంగారు కానుకలు సమర్పిస్తానని కేసీఆర్ ఉద్యమ సమయంలో మొక్కుకున్నారు. ఇప్పటికే తిరుమల శ్రీవారికి సాలిగ్రామహారం, కంఠాభరణం.. వరంగల్‌లోని భద్రకాళి అమ్మవారికి బంగారు కిరీటం.. కురవిలోని వీరభద్రస్వామికి బంగారు మీసాలు సమర్పించారు. ఇప్పుడు దుర్గమ్మ మొక్కు చెల్లించుకున్నారు.

0 Comments Write your comment

    1. Loading...